Կրթությունն առաջնահերթությունների շարքում
մարտ 24, 2025
Այսօր Բնապահպանության և ընդերքի տեսչական մարմնի ղեկավար Հովհաննես Մարտիրոսյանը դասախոսությամբ հանդես է եկել Երևանի պետական համալսարանի Ա. Իսկոյանի անվան էկոլոգիական իրավունքի կենտրոնում։
Դասախոսությանը մասնակցել են ԵՊՀ Իրավագիտության ֆակուլտետի մագիստրատուրայի և բակալավրի 3-րդ կուրսի ուսանողները՝ ՀՀ էկոլոգիական իրավունք դասընթացի շրջանակներում:
Հ.Մարտիրոսյանը ներկայացրել է վերահսկողության հիմնական ուղղություններն ու ձևերը, մանրամասն քննարկել ոլորտի ընթացիկ վիճակը, պատասխանել ուսանողների հնչեցրած հարցերին:
ԵՊՀ իրավագիտության ֆակուլտետի դոցենտ Օլիմպիա Գեղամյանը շնորհակալություն է հայտնել շուրջ 4 տարվա համագործակցության համար, կարևորելով ոլորտի լիազոր մարմինների հետ անմիջական շփումները, որոնք նպաստում են տեսական գիտելիքներ ստանալուն զուգահեռ՝ գործնականում արդյունավետ կիրառմանը։
ԲԸՏՄ ղեկավարը բարձր է գնահատել համագործակցությունը գիտակրթական հաստատությունների՝ հատկապես որպես ապագա մասնագետների պատրաստման երաշխավորների հետ: